Մայրիկ. Առակ

Ծնվելուց մեկ օր առաջ երեխան հարցրեց Աստծուն. 

-Ասում են` վաղը ես Երկիր եմ ուղևորվելու, բայց ախր ինչպե՜ս եմ այնտեղ ապրելու, չէ որ դեռ շատ փոքր եմ և անպաշտպան:

Աստված պատասխանեց.

-Ես Հրեշտակ կտամ քեզ, ով կսպասի քեզ և հոգ կտանի քո մասին:

Երեխան, փոքր-ինչ մտածելով, կրկին հարցրեց.

-Այստեղ`Երկնքում, ես միայն երգում և ուրախանում եմ և այս ամենը ինձ բավական է երջանիկ լինելու համար:

Աստված պատասխանեց.

-Քո Հրեշտակը կերգի և կուրախացնի քեզ, և դու, զգալով նրա սերը, կերջանկանաս:

Երեխան շարունակեց հարցերը.

-Ես լսել եմ, որ Երկրի վրա ապրում է Չարը. ո՜վ կպաշտպանի ինձ նրանից:

-Քո Հրեշտակը կպաշտպանի քեզ` երբեմն նույնիսկ իր իսկ կյանքը չխնայելով,-պատասխանեց Աստված:

-Ես շատ կտխրեմ, քանի որ այլևս քեզ չեմ տեսնի:

-Հրեշտակը կպատմի քեզ իմ մասին և ցույց կտա ճանապարհը դեպի ինձ,-մեղմ ժպիտով պատասխանեց Աստված:

Այդ իսկ վայրկյանին Երկրից սկսեցին բղավոցներ լսվել, և երեխան փութկոտ հարցրեց Աստծուն.

-Տե՜ր, իսկ ինչպես է այդ Հրեշտակի անունը, որի մասին այդքան պատմում էիր:

Աստված, շոյելով երեխայի գլուխը, պատասխանեց.

-Անունը կարևոր չէ, դու ուղղակի նրան ՄԱՅՐԻԿ կանվանես: